ਵਰਤਮਾਨ ਮਨੁੱਖ ਖਪਤਕਾਰੀ ਤੋਂ ਆਤਮ ਹੱਤਿਆ ਤੱਕ - ਗੁਰਚਰਨ ਸਿੰਘ ਪੱਖੋਕਲਾਂ

ਬਾਜ਼ਾਰ ਤਾਂ ਸਦਾ ਰਹੇ ਹਨ ਪਰ ਹੁਣ ਮਨੁੱਖ ਬਾਜ਼ਾਰ ਦਾ ‘ਲਾਈ-ਲੱਗ’ ਬਣ ਗਿਆ ਹੈ। ਅੱਗੇ ਤਾਂ ਅਸੀਲ ਪਸ਼ੂ ‘ਲਾਦੂ’ ਅਖਵਾਉਂਦੇ ਸਨ ਪਰ ਹੁਣ ਮਨੁੱਖ ਅਣਜਾਣੇ ਹੀ ਬਾਜ਼ਾਰ ਦਾ ਲਾਦੂ ਬਣ ਗਿਆ ਹੈ। ਬਾਜ਼ਾਰ ਸਾਡੇ ਘਰਾਂ ਵਿੱਚ ਧੁੱਸ ਆਇਆ ਹੈ। ਜਿੱਥੇ ਜਿੱਥੇ ਇਸ ਦੀ ਤੇਜ਼ੀ ਵੇਖਣ ਨੂੰ ਮਿਲ ਰਹੀ ਹੈ, ਉੱਥੇ ਉੱਥੇ ਸਾਡਾ ਮਨੁੱਖੀ ਚਿਹਰਾ ਗਾਇਬ ਹੋ ਰਿਹਾ ਹੈ। ਮਨੋਰੰਜਨ ਦੀਆਂ ਵਸਤਾਂ ਪ੍ਰਤੀ ਹੋੜ ਮਨੁੱਖ ਨੂੰ ਬਾਜ਼ਾਰ ਦਾ ਖਿਡੌਣਾ ਬਣਾ ਰਹੀ ਹੈ। ਉਹ ਆਪਣੇ ਵਿਵੇਕ ਤੋਂ ਕੰਮ ਲੈਣ ਦੀ ਥਾਂ ਬਾਜ਼ਾਰ ਦੀਆਂ ਸ਼ਕਤੀਆਂ ਦਾ ਨਚਾਇਆ ਨੱਚੀ ਜਾਂਦਾ ਹੈ। ਹੁਣ ਦੁਸ਼ਮਣ ਕਿਤੇ ਵਿਖਾਈ ਨਹੀਂ ਦਿੰਦਾ ਜਦਕਿ ਉਸ ਦੀ ਜਕੜ ਸਾਡੇ ਦੁਆਲੇ ਮਜ਼ਬੂਤ ਹੁੰਦੀ ਜਾ ਰਹੀ ਹੈ।ਕੀੜੀਆਂ ਦੇ ਭੌਣ ਵਾਂਗ ਫਿਰਦੇ ਲੋਕਾਂ ਦੇ ਵਿਚਾਲੇ ਹਰ ਕੋਈ ਇਕੱਲਾ ਮਹਿਸੂਸ ਕਰ ਰਿਹਾ ਹੈ। ਪੈਸੇ ਵਾਲਿਆਂ ਲਈ ਸੰਚਾਰ ਅਤੇ ਸੁੱਖ-ਸਾਧਨਾਂ ਦੀ ਬਹੁਤਾਤ ਹੈ। ਐਪਰ ਪੈਸਾ ਕਮਾਉਣ ਨਾਲੋਂ ਹਥਿਆਉਣ ਦੀ ਬਿਰਤੀ ਜ਼ੋਰ ਫੜ ਰਹੀ ਹੈ।