ਬਸੰਤ- ਮਲਕੀਅਤ ਸੁਹਲ

Posted on:- 04-02-2014

ਹੱਸ ਹੱਸ ਮਹਿਕਾਂ ਵੰਡਦੀ,
ਵਿਹੜੇ ਆਈ ਬਸੰਤ।

ਪੱਤਝੜ ਮੇਰੇ ਰੁੱਖ਼ੜੇ,
ਬੈਠੀ ਸੀ ਜਦ ਆ।
ਬ੍ਰਿਹੋਂ ਚੰਦਰਾ ਆਖਦਾ,
ਖੈਰ ਵਸਲ ਦਾ ਪਾ।
ਬੁਲਬਲ ਦੇ ਗੀਤ ਦਾ
ਹੋ ਨਾ ਜਾਵੇ ਅੰਤ।
ਹੱਸ ਕੇ ਮਹਿਕਾਂ ਵੰਡਦੀ,
ਵਿਹੜੇ ਆਈ ਬਸੰਤ।

ਰੁੰਡ- ਮਰੁੰਡੇ ਰੁਖ਼ਾਂ ਤੋਂ,
ਅੱਜ ਆਵੇ ਨਾ ਖ਼ੁਸ਼ਬੋ।
ਸੀਨੇ ਸੂਲਾਂ ਤਿੱਖੀਆਂ,
ਨੇ ਦਿਤਾ ਤੀਰ ਖ਼ੁਭੋ।
ਨਿੱਘੀ- ਨਿੱਘੀ ਧੁੱਪ ਚੋਂ
ਸਰਦੀ ਹੋਈ ਉਡੰਤ।
ਹੱਸ ਕੇ ਮਹਿਕਾਂ ਵੰਡਦੀ,
ਵਿਹੜੇ ਆਈ ਬਸੰਤ।

ਸੂਟ ਬਸੰਤੀ ਪਾ ਕੇ,
ਨੱਚੀ ਅੱਜ ਮੁਟਿਆਰ।
ਸਰ੍ਹੋਂ ਰੰਗ ਵੀ ਬਦਲਿਆ,
ਬਾਗ਼ੀਂ ਖਿੜੀ ਬਹਾਰ।
ਖਿੜੇ ਫ਼ੁੱਲ ਬਗੀਚੱੜੇ
ਰੱਬ ਹੋਇਆ ਬੇਅੰਤ।
ਹੱਸ ਕੇ ਮਹਿਕਾਂ ਵੰਡਦੀ,
ਵਿਹੜੇ ਆਈ ਬਸੰਤ।

ਨਵੀਂ ਕਰੂੰਬਲ ਨਿਕਲੀ,
ਟਾਹਣੀਂ ਵਿਚੋਂ ਅੱਜ ।
ਜੀਕਣ ਕੁੜੀ ਮਲੂਕੜੀ,
ਨਿਕਲੀ ਮੁੱਖ਼ੜਾ ਕੱਜ।
ਪ੍ਰਦੇਸਾ ਵਿਚੋਂ ਆ ਗਿਆ
"ਸੁਹਲ" ਮੇਰਾ ਕੰਤ।
ਹੱਸ ਕੇ ਮਹਿਕਾਂ ਵੰਡਦੀ,
ਵਿਹੜੇ ਆਈ ਬਸੰਤ।

ਸੰਪਰਕ: +91 98728 48610

ਬਸੰਤ- ਮਲਕੀਅਤ ਸੁਹਲ

Posted on:- 04-02-2014

Comments

ਕਾਵਿ-ਸ਼ਾਰ

ਖ਼ਬਰਸਾਰ

ਕਾਵਿ-ਸ਼ਾਰ

ਕਿਤਾਬਾਂ

ਚਿੰਤਨ

ਕਾਤਰਾਂ

ਕਹਾਣੀ

ਐਡਵਰਟਾਈਜ਼ਮੈਂਟ

ਆਬ ਪਬਲੀਕੇਸ਼ਨਜ਼ ਵੱਲੋਂ ਪ੍ਰਕਾਸ਼ਿਤ ਪੁਸਤਕਾਂ