ਕਵੀਆਂ ਵਰਗੇ… – ਹਰਜਿੰਦਰ ਗੁਲਪੁਰ

ਕਿਰਤ ਦੇ ਉੱਤੇ ਫੱਟਾ ਲਾਇਆ,
ਕਾਰ ਸੇਵਾ ਦਾ “ਸੰਤਾਂ”ਨੇ,
ਐਰੇ ਗੈਰੇ ਦਾ ਕੰਮ ਹੈ ਨੀ,
ਇਹ ਹੈ ਕੰਮ “ਸਲੱਗਾਂ”ਦਾ

ਵਿਰਲੇ ਆਖਣ ਦੇਖ ਕੇ,
ਨਕਸ਼ਾ ਡੂੰਘੇ ਭੋਰੇ ਦਾ,
ਬਾਬੇ ਲੈਂਦੇ ਠੇਕਾ ਭੇਡਾਂ,
ਚਾਰਨ ਦੇ ਲਈ ਵੱਗਾਂ ਦਾ

ਦੁਨੀਆਂ ਦਾਰੀ ਉੱਤੇ ਲਾ ਕੇ,
ਚੇਪੀ ਬੈਠ ਗਏ,
ਰਹਿਣ ਭੁਲੇਖਾ ਦਿੰਦੇ,
ਸਾਬਣ ਜਿਹੀਆਂ ਝੱਗਾਂ ਦਾ

ਅਰਜੀ ਜਦੋਂ ਫੜਾਈਏ,
ਲੋਕਰਾਜ ਦੇ ਰਾਜੇ ਨੂੰ,
ਅਖਾਂ ਵਿਚ ਲਸ਼ਕਾਰਾ ਪੈਂਦਾ,
ਮੁੰਦਰੀ ਵਾਲੇ ਨਗਾਂ ਦਾ

ਮਾੜੇ ਲੇਖਕ ਦੀ ਤਾਂ ਇਥੇ,
ਕੋਈ ਵੀ ਪੁਛ ਪ੍ਰਤੀਤ ਨਹੀਂ,
ਫੇਸ ਬੁੱਕ ਤੇ ਪਿਆ ਝਮੇਲਾ,
ਕਵੀਆਂ ਵਰਗੇ “ਗੱਗਾਂ”ਦਾ