ਦਰਦ ਦਿਲ ਦਾ ਵਧ ਰਿਹਾ ਹੈ, ਦਿਲਲਗੀ ਦੇ ਨਾਲ ਨਾਲ ।
ਬੇਬਸੀ ਵੀ ਪਲ ਰਹੀ ਹੈ, ਬੇਖੁਦੀ ਦੇ ਨਾਲ ਨਾਲ ।
ਕਰ ਰਿਹਾ ਏਂ ਦਿਲਬਰਾ ਤੂੰ,ਬਣ ਕੇ ਨਸ਼ਤਰ ਦਿਲ ਤੇ ਵਾਰ,
ਇੰਝ ਦਾ ਮੰਜਰ ਹੈ ਤੇਰੀ, ਦੋਸਤੀ ਦੇ ਨਾਲ ਨਾਲ ।
ਖੌਫ਼ ਦਿਲ ਚੋਂ ਮੌਤ ਦਾ ਕੱਢ ,ਜਿੰਦਗੀ ਤੇ ਰੱਖ ਯਕੀਨ,
ਮੌਤ ਤਾਂ ਚਲਦੀ ਰਹੇਗੀ. ਜਿੰਦਗੀ ਦੇ ਨਾਲ ਨਾਲ ।
ਉਹ ਬੜੇ ਮਾਸੂਮ ਬਣਕੇ, ਭਾਲਦੇ ਨੇ ਮਦਦਗਾਰ,
ਲੁਟ ਰਹੇ ਪਰ ਚਿਹਰਿਆਂ ਦੀ, ਸਾਦਗੀ ਦੇ ਨਾਲ ਨਾਲ ।
ਆਦਮੀ ਦੀ ਹਰ ਸਹੂਲਤ, ਵਾਸਤੇ ਹੈ ਇੰਤਜ਼ਾਮ,
ਹੈ ਨੇ ਮੈਖਾਨੇ ਤੇ ਮੰਦਿਰ, ਹਰ ਗਲੀ ਦੇ ਨਾਲ ਨਾਲ ।
ਚਾਨਣੀ ਦਾ ਮੁੱਲ ਨਾ ਪੈਂਦਾ, ਨ੍ਹੇਰਿਆਂ ਦੇ ਵੀ ਬਗੈਰ,
ਸਫ਼ਰ ਨ੍ਹੇਰੇ ਦਾ ਜਰੂਰੀ, ਰੌਸ਼ਨੀ ਦੇ ਨਾਲ ਨਾਲ ।
ਬਸ ਨਸੀਹਤ ਦੇਣ ਖਾਤਿਰ, ਲਿਖ ਰਿਹਾ ਗਜ਼ਲਾਂ ਤੂੰ ਸੋਹਲ,
ਅਮਲ ਵੀ ਪਰ ਹੈ ਜਰੂਰੀ, ਸ਼ਾਇਰੀ ਦੇ ਨਾਲ ਨਾਲ ।
ਈ-ਮੇਲ: rbsohal@gmail.com
