ਵੇਲ੍ਹ ਮੱਛੀਆਂ -ਨੀਲ

ਅਣਥੱਕ ਮੁਸ਼ੱਕਤ ਕਰਦੀਆਂ
ਕਦੀਂ ਪਾਣੀ ਦੀਆਂ ਧਾਰਾਵਾਂ ਨਾਲ ਜੂਝਦੀਆਂ

ਅਤੇ ਕਦੀਂ
ਸੋਧਾਂ ਵਰਗੀਆਂ ਛੱਲਾਂ ਨਾਲ ਅਟਖੇਲੀਆਂ ਕਰਦੀਆਂ
ਸਮੁੰਦਰ ਦੀ ਤਲੀ ‘ਤੇ ਕੁਦਰਤੀਂ ਛਪੀਆਂ
ਕਾਨੂੰਨੀ ਕਿਤਾਬਾਂ ਨੂੰ ਪੜ੍ਹਨ ਲਈ
ਵਾਰੋ ਵਾਰ ਚੁੱਭੀਆਂ ਲਾਉਂਦੀਆਂ

ਰਾਤੀਂ ਚਿਰਕੇ ਤੀਕ ਜਾਗਦੀਆਂ
ਅਤੇ ਭਲਕੇ ਸੁੱਚੇ ਵੇਲੇ ਜਾਗਦੀਆਂ
ਤੱਥਾਂ ਨੂੰ ਪੜ੍ਹਚੌਲਦੀਆਂ
ਸਬੂਤਾਂ ਨੂੰ ਇਕੱਤਰ ਕਰਦੀਆਂ

ਪੇਸ਼ੇਵਰ ਕਲਾ ਨਾਲ ਭਰਪੂਰ
ਅਤੇ ਸਲੀਕੇ ਨਾਲ ਮਾਰੀਆਂ
ਆਪੋ ਆਪਣੀਆਂ ਤਿੱਖ਼ੀਆਂ ਚੀਕਾਂ ਨੂੰ
ਸਹੀ ਜਤਲਾਉਂਦੀਆਂ
ਅਤੇ ਇਨਸਾਫ਼ ਦੇ ਸਮੁੰਦਰ ਨੂੰ
ਆਪੋ ਆਪਣੇ ਮੁਵੱਕਿਲ ਦੇ ਹੱਕ ਵਿਚ
ਫੈਸਲੇ ਸੁਣਾਉਣ ਲਈ ਉਕਸਾਉਂਦੀਆਂ

ਅਤੇ ਪੂਰਾ ਜ਼ੋਰ ਲਾਉਣ ਮਗ਼ਰੋਂ
ਇਨਸਾਫ਼ ਦੇ ਸਮੁੰਦਰ ਦੇ
ਠਹਿਰਾਵ ਭਰੇ ਫੈਸਲਿਆਂ ਦਾ
ਇੰਤਜ਼ਾਰ ਕਰਦੀਆਂ……

……ਫੈਸਲੇ ਸੁਣਨ ਮਗਰੋਂ
ਕੁਝ ਜਿੱਤ ਦੀ ਖ਼ੁਸ਼ੀ ਮਨਾਉਂਦੀਆਂ
ਅਤੇ ਕੁਝ ਹਾਰਨ ਮਗ਼ਰੋਂ
ਇਨਸਾਫ਼ ਦੇ ਮਹਾਂ-ਸਮੁੰਦਰ ਵੱਲ ਦਾ ਰੁਖ ਕਰਦੀਆਂ
ਇਨਸਾਫ਼ ਦੇ ਸਮੁੰਦਰ ਵਿਚ ਤਰਦੀਆਂ
ਕਾਲੀਆਂ ਚਿੱਟੀਆਂ
ਵੇਲ੍ਹ ਮੱਛੀਆਂ ।