ਰਾਜਨੀਤਿਕ ਚਲਾਕੀਆਂ – ਗੁਰਮੇਲ ਬੀਰੋਕੇ

ਬੰਬੇ ਤੋਂ ਲਿਆਂਦੀ ਹੀਰੋਇਨ
ਖੜ੍ਹੀ ਕੀਤੀ ਵਿੱਚ ਵੋਟਾਂ ਦੇ

ਉਹਦੀਆਂ ਗੱਲ੍ਹਾਂ ਦੇ ਟੋਇਆਂ ਵਿੱਚ
ਡੁੱਬ ਜਾਣੇ ਸਾਰੇ ਦੁੱਖ ਲੋਕਾਂ ਦੇ

ਇਹਦੇ ਪਿੰਡੇ ਵਾਂਗ ਹੋਣਗੀਆਂ
ਕੂਲ਼ੀਆਂ ਕੂਲ਼ੀਆਂ ਸੜਕਾਂ ਜੀ

ਕਾਗਜਾਂ ਵਿੱਚ ਹੋਉ ਤਰੱਕੀ
ਕੱਢ ਦਿਆਂਗੇ ਸਭ ਰੜਕਾਂ ਜੀ

ਢੱਠੇ ਸਕੂਲ ਬਿਨ੍ਹਾਂ ਅਧਿਆਪਕ
ਪੜ੍ਹਣਗੇ ਬੱਚੇ ਇਹਦੀਆਂ ਕਿਤਾਬਾਂ ਨੂੰ

ਮਾਵਾਂ ਭੈਣਾਂ ਧੀਆਂ ਥੋਡੀਆਂ
ਦਬਾ ਰੱਖਣਗੀਆਂ ਅਜ਼ਾਦੀ ਦੇ ਖ਼ਾਬਾਂ ਨੂੰ

ਢਿੱਡ ਭਰਨੇ ਲਈ ਰੱਜ ਰੱਜ ਸੁੰਘੋ
ਇਹਦੇ ਸੁਰਖੀ ਪਾਉਡਰ ਦੀਆਂ ਲਪਟਾਂ ਜੀ

ਡਾਕੇ ਮਾਰੋ ਨਸ਼ੇ ਵੇਚੋ
ਠਾਣਾ ਨਾ ਲਿਖੂਗਾ ਕਦੇ ਰਪਟਾਂ ਜੀ

ਵਾਰੇ ਨਿਆਰੇ ਖੇਤਾਂ ਵਿੱਚ ਹੋਣੇ
ਕੋਹ-ਕਾਫ਼ ਦੀਆਂ ਪਰੀਆਂ ਨਰਮਾਂ ਚੁੱਗਣਗੀਆਂ

ਕਣਕ ਝੋਨਾ ਮੋਠ ਜੋ ਮਰਜ਼ੀ ਬੀਜੋ
ਸਾਰੇ ਦੇਸ ਵਿੱਚ ਦਾਖਾਂ ਹੀ ਉੱਗਣਗੀਆਂ

ਇਹ ਬੀਬੀ ਹਰ ਮਰਜ਼ ਦੀ ਦਵਾ ਹੈ
ਤੋੜ ਦੇਉਗੀ ਰੋਗ ਸਾਰੇ ਹੀ ਥੋਡੇ ਜੀ

ਹਸਪਤਾਲ ਸਾਰੇ ਬੰਦ ਕਰ ਦੇਣੇ
ਬੁੱਢਿਆਂ ਦੇ ਆਪੇ ਚੱਲ ਪੈਣਗੇ ਗੋਡੇ ਜੀ |