ਇਸ ਸਮੇਂ ਬੁਲਾਰਿਆਂ ਨੇ ਪੰਜਾਬ ਸਮੇਤ ਭਾਰਤ ਅੰਦਰ ਮੁੱਢਲੀ ਵਿਦਿਅਕ ਵਿਵਸਥਾ ਦੀ ਮਾੜੀ ਦਸ਼ਾ ਅਤੇ ਸਿੱਖਿਆ ਦੇ ਨਿੱਜੀਕਰਨ ਦੇ ਮਾਰੂ ਹਮਲਿਆਂ ਸਬੰਧੀ ਵਿਸਥਾਰਤ ਜਾਣਕਾਰੀ ਦਿੱਤੀ। ਉਨ੍ਹਾਂ ਨੇ ‘ਸਿੱਖਿਆ ਦੇ ਭਗਵੇਂਕਰਨ’ ਵਿਸ਼ੇ ਤੇ ਬੋਲਦਿਆਂ ਭਾਰਤੀ ਵਿਦਿਅਕ ਪ੍ਰਣਾਲੀ ਨੂੰ ਫਿਰਕੂ ਲੀਹਾਂ ਤੇ ਢਾਲਣ ਦੀਆਂ ਸਾਜਿਸ਼ਾਂ ਬਾਰੇ ਚਿੰਤਾ ਜਾਹਰ ਕੀਤੀ। ਇਸ ਸਮੇਂ ਡਾ. ਅਨਿਲ ਸਦਗੋਪਾਲ ਨੇ ਆਪਣੇ ਲੰਮੇ ਭਾਸ਼ਣ ਅੰਦਰ ਕਿਹਾ ਕਿ ਬਰਾਬਰ ਸਕੂਲ ਵਿਵਸਥਾ ਦੀ ਲੜਾਈ ਅਸਲ ਅਰਥਾਂ ਵਿੱਚ ਸਿੱਖਿਆ ਖੇਤਰ ‘ਚ ਨਿੱਜੀਕਰਨ-ਉਦਾਰੀਕਰਨ ਦੀ ਨੀਤੀਆਂ ਖਿਲਾਫ ਸਾਂਝੀ ਵੱਡੀ ਲੜਾਈ ਦਾ ਅਧਾਰ ਬਣਦੀ ਹੈ।
ਹਾਜ਼ਰ ਸਰੋਤਿਆਂ ਨੇ ਅਨੇਕਾਂ ਮਹੱਤਵਪੂਰਨ ਸਵਾਲਾਂ ਤੇ ਵਿਚਾਰ-ਚਰਚਾ ਕੀਤੀ। ਪੰਜਾਬ ਭਰ ‘ਚੋਂ ਡੀਟੀਐਫ, ਡੀਐਸਓ, ਇਨਕਲਾਬੀ ਨੌਜਵਾਨ-ਵਿਦਿਆਰਥੀ ਮੰਚ, ਪੀਐਸਯੂ, ਪੀਐਸਯੂ (ਰੰਧਾਵਾ), ਨੌਜਵਾਨ ਭਾਰਤ ਸਭਾ, ਤਰਕਸ਼ੀਲ ਸੁਸਾਇਟੀ ਪੰਜਾਬ, ਜਮਹੂਰੀ ਅਧਿਕਾਰ ਸਭਾ, ਇਨਕਲਾਬੀ ਕੇਂਦਰ ਪੰਜਾਬ, ਐਸਐਸਏ/ਰਮਸਾ, ਨੈਟ ਪਾਸ ਬੇਰੁਜਗਾਰ ਯੂਨੀਅਨ, ਲੋਕ ਕਲਾ ਮੰਚ ਆਦਿ ਜੱਥੇਬੰਦੀਆਂ ਅਤੇ ਲੇਖਕਾਂ, ਬੁੱਧੀਜੀਵੀਆਂ ਚਿੰਤਕਾਂ ਨੇ ਵੱਡੀ ਗਿਣਤੀ ‘ਚ ਇਸ ਤਿੰਨ ਰੋਜਾ ਵਰਕਸ਼ਾਪ ‘ਚ ਸ਼ਮੂਲੀਅਤ ਕੀਤੀ। ਵਰਕਸ਼ਾਪ ਦੌਰਾਨ ਨਵੰਬਰ ਮਹੀਨੇ ‘ਚ ਪੰਜਾਬ ਅੰਦਰ ਸਿੱਖਿਆ ਸੰਘਰਸ਼ ਯਾਤਰਾ ਕੱਢਣ ਅਤੇ 4 ਦਸੰਬਰ ਨੂੰ ਭੂਪਾਲ ਪੁੱਜਣ ਲਈ ਸੂਬਾ ਪੱਧਰੀ ਕਮੇਟੀ ਜੱਥੇਬੰਦ ਕੀਤੀ ਗਈ। ਕਮੇਟੀ ‘ਚ ਉਪਰੋਕਤ ਜੱਥੇਬੰਦੀਆਂ ਦੇ ਆਗੂ ਪ੍ਰੋ. ਜਗਮੋਹਨ ਸਿੰਘ, ਕੰਵਲਜੀਤ ਖੰਨਾ, ਭੁਪਿੰਦਰ ਵੜੈਚ, ਡਾ. ਭੀਮਇੰਦਰ, ਡਾ. ਕੁਲਦੀਪ, ਪ੍ਰਿੰ. ਤਰਲੋਕਬੰਧੂ, ਅਮਰਜੀਤ, ਮਨਦੀਪ, ਨਰਾਇਣ ਦੱਤ, ਹੇਮਰਾਜ ਸਟੈਨੋ, ਨਰਭਿੰਦਰ, ਹਰਬੰਸ ਸੋਨੂ, ਰਾਜਿੰਦਰ ਸਿੰਘ, ਸ਼ਾਮਲ ਹੋਏ। ਮੰਚ ਸੰਚਾਲਨ ਕੁੱਲ ਹਿੰਦ ਸਿੱਖਿਆ ਅਧਿਕਾਰ ਮੰਚ ਦੇ ਪ੍ਰੀਜ਼ੀਡੀਅਮ ਮੈਂਬਰ ਕੰਵਲਜੀਤ ਖੰਨਾ ਨੇ ਕੀਤਾ।
