ਕਿਉਂ ਨਾ ਬੋਲਾਂ ? – ਮਨਦੀਪ ਸੁੱਜੌ

ਕਿਉਂ ਨਾ ਬੋਲਾਂ?

ਉਹਨਾਂ ਦਹਿਸ਼ਤਗਰਦਾਂ ਵਿਰੁੱਧ ?
ਜੋ ਨਿਰਧਾਰਿਤ ਕਰਦੇ
ਦਾਇਰੇ ਜੀਵਨ ਜਿਊਣ ਦੇ,
ਦੱਸਦੇ ਸੁਆਣੀਂ ਨੂੰ
ਕੀ ਪਾਉਣਾ ਕੀ ਹੰਢਾਉਣਾ ,

ਜੋ ਬਦਲਦੇ ਰੰਗ
ਬੱਚਿਆਂ ਦੀਆਂ ਦਸਤਾਰਾਂ ਦਾ
ਏ.ਕੇ 47 ਦੀਆਂ ਨੋਕਾਂ ’ਤੇ ।

ਕਿਉਂ ਨਾ ਬੋਲਾਂ
ਮੌਤ ਦੇ ਸੌਦਾਗਰਾਂ ਵਿਰੁੱਧ ?
ਜੋ ਜੁੰਮੇਵਾਰ ਬਣੇ

ਮਾਤਮ ਛਾਏ ਵਿਹੜਿਆਂ ਦੇ,
ਜਿੱਥੋਂ ਬਰਾਤ ਤੁਰਨੀ ਸੀ
ਜਿੱਥੇ ਡੋਲੀ ਢੁੱਕਣੀ ਸੀ,

ਤੇ ਆਪਣੀ ਵਾਰੀ
ਭਿੱਜੀ ਬਿੱਲੀ ਬਣ ਲੁੱਕੇ
ਮਸਜਿਦਾਂ, ਮੰਦਰਾਂ ਤੇ
ਗੁਰਦੁਆਰਿਆਂ ਵਿੱਚ ।

ਕਿਉਂ ਨਾ ਬੋਲਾਂ
ਉਹਨਾਂ ਪਖੰਡੀਆਂ ਵਿਰੁੱਧ ?
ਜੋ ਰਜਾਉਂਦੇ ਨੇ ਮੂਰਤੀਆਂ
ਦੁੱਧ ਪਿਲਾ ਕੇ
ਫਲ ਖੁਆ ਕੇ ।

ਕਿਉਂ ਨਾ ਬੋਲਾਂ
ਉਹਨਾਂ ਸੌਦਿਆਂ ਵਿਰੁੱਧ?
ਜੋ ਕਾਤਲ ਨੇ
ਬਲਾਤਕਾਰੀ ਝੂਠੇ ਨੇ,
ਫਿਰ ਵੀ ਸੱਚੇ ਅਖਵਾਉਂਦੇ ਨੇ ।

ਕਿਉਂ ਨਾ ਬੋਲਾਂ
ਉਹਨਾਂ ਸਵਾਮੀਆਂ ਵਿਰੁੱਧ ?
ਜੋ ਦੱਬਦੇ ਨੇ ਜ਼ਮੀਨ
ਕਿਸਾਨ ਦੀ,
ਰਾਧਾ – ਰਾਧਾ ਕਰਕੇ ।

ਕਿਉਂ ਨਾ ਬੋਲਾਂ
ਧਰਮੀਂ ਟਰਾਂਸਫਾਰਮਾਂ ਵਿਰੁੱਧ ?
ਜੋ ਖੁਦ ਸੜ੍ਹੇ ਨੇ
ਲੋਕਾਂ  ਨੂੰ ਰੋਸ਼ਨੀ ਦਿੰਦੇ ਨੇ ।