ਬੁਢਲਾਡਾ: ਲੋਕ ਸਭਾ ਚੋਣਾਂ ਚ ਰੁੱਝੇ ਪ੍ਰਸ਼ਾਸਨ ਨੂੰ ਮੰਡੀਆਂ ਚ ਰੁਲ ਰਹੇ ਕਿਸਾਨਾਂ ਦਾ ਉੱਕਾ ਹੀ ਖਿਆਲ ਨਹੀਂ।ਹਾਲਾਤ ਇਹ ਹਨ ਕਿ ਕਈ ਥਾਈ ਇੰਸਪੈਕਟਰਾਂ ਨੇ ਖਰੀਦ ਮੰਡੀਆਂ ਤੋ ਹਾਲੇ ਤੱਕ ਦੂਰੀ ਬਣਾਈ ਹੋਈ ਹੈ।ਕੁਝ ਅਨਾਜ ਮੰਡੀਆਂ ਚ ਬੈਠੇ ਕਿਸਾਨਾਂ ਨੂੰ ਤਾਂ ਅਜੇ ਤੱਕ ਇਹ ਵੀ ਪਤਾ ਨਹੀਂ ਲੱਗ ਸਕਿਆ ਕਿ ਜਿਸ ਖਰੀਦ ਕੇਦਰ ਚ ਉਹ ਆਪਣੀ ਕਣਕ ਵੇਚਣ ਆਏ ਹਨ ਉਥੇ ਖਰੀਦ ਕਿਸ ਏਜੰਸੀ ਦੀ ਹੈ।ਸ਼ੇਰਖਾਂ ਵਾਲਾ ਦੇ ਖਰੀਦ ਕੇਦਰ ਚ ਬੈਠੇ ਮੰਘਾਣੀਆਂ ਵਾਸੀ ਗੁਰਚਰਨ ਸਿੰਘ ਨੇ ਦੱਸਿਆ ਕਿ ਉਹ ਪਿਛਲੇ ਛੇ ਦਿਨ ਮੰਡੀ ਚ ਆਪਣੀ ਕਣਕ ਵੇਚਣ ਲਈ ਬੈਠੇ ਹਨ ਪਰ ਅਜੇ ਤੱਕ ਇਥੇ ਕੋਈ ਖਰੀਦ ਅਧਿਕਾਰੀ ਨਹੀਂ ਪੁੱਜਿਆ।ਉਨਾਂ ਇਥੋ ਤੱਕ ਕਿਹਾ ਕਿ ਮੰਡੀ ਚ ਕਿਸਾਨ ਆਪਣੀ ਕਣਕ ਲਈ ਬੈਠੇ ਹਨ ਪਰ ਉਨਾਂ ਨੂੰ ਅਜੇ ਤੱਕ ਇਹ ਪਤਾ ਨਹੀਂ ਲੱਗਿਆ ਕਿ ਇਸ ਕੇਂਦਰ ਦੀ ਖਰੀਦ ਕਿਹੜੀ ਏਜੰਸੀ ਕੋਲ ਹੈ।ਦੂਜੇ ਪਾਸੇ ਬਿਗੜ ਰਹੇ ਮੌਸਮੀ ਮਿਜਾਜ ਨੂੰ ਦੇਖ ਕਾਹਲੀ ਨਾਲ ਫਸਲ ਕੱਟਕੇ ਅਨਾਜ ਮੰਡੀਆਂ ਚ ਲਿਆਂਦੀ ਕਣਕ ਚ ਨਮੀ ਦਾ ਮਾਤਰਾ ਵੱਧ ਹੋਣ ਕਾਰਨ ਪ੍ਰਾਈਵੇਟ ਖਰੀਦਦਾਰਾਂ ਨੇ ਅਜੇ ਤੱਕ ਕਿਸੇ ਵੀ ਮੰਡੀ ਚ ਆਪਣਾ ਖਾਤਾ ਨਹੀਂ ਖੋਲਿਆ।ਮਾਰਕੀਟ ਕਮੇਟੀ ਬੋਹਾ ਦੀ ਗੱਲ ਕਰੀਏ ਤਾਂ ਮੁੱਖ ਯਾਰਡ ਸਮੇਤ ਇਸ ਅਧੀਨ ਆਉਦੇ 13 ਖਰੀਦ ਕੇਦਰਾਂ ਚ ਸਾਲ 2013 ਦੌਰਾਨ 20 ਅਪ੍ਰੈਲ ਤੱਕ 13690 ਟਨ ਕਣਕ ਦੀ ਆਮਦ ਹੋਈ ਸੀ ਜਿਹੜੀ ਅੱਜ ਘਟਕੇ ਕੇਵਲ 6435 ਰਹਿ ਗਈ ਹੈ।ਪਿਛਲੇ ਵਰੇ 20 ਅਪ੍ਰੈਲ ਤੱਕ ਖਰੀਦ ਕੇਦਰਾਂ ਚ ਹੋਈ ਕਣਕ ਦੀ ਆਮਦ ਨਾਲੋਂ ਇਸ ਵਰੇ 53 ਫੀਸਦੀ ਕਮੀ ਦਰਜ ਕੀਤੀ ਗਈ ਹੈ।
ਖਰੀਦ ਕੇਦਰਾਂ ਦੀ ਲਿਫਟਿੰਗ ‘ਜ਼ੀਰੋ’:
ਮਾਰਕੀਟ ਕਮੇਟੀ ਬੋਹਾ ਦੇ ਮੁੱਖ ਯਾਰਡ ਸਮੇਤ ਇਸ ਅਧੀਨ ਆਉਦੇ 13 ਅਨਾਜ ਖਰੀਦ ਕੇਦਰਾਂ ਚ ਖਰੀਦੀ 6435 ਟਨ ਕਣਕ ਚੋ ਇੱਕ ਦਾਣਾ ਵੀ ਲਿਫਟਿੰਗ ਨਹੀਂ ਕੀਤਾ ਗਿਆ।ਜਿਸ ਨਾਲ ਆਉਣ ਵਾਲੇ ਦਿਨਾਂ ਚ ਮੰਡੀਆਂ ਦਾ ਇਹ ਸੰਕਟ ਵੱਡਾ ਹੋਣ ਦਾ ਖਦਸ਼ਾ ਪ੍ਰਗਟਾਇਆ ਜਾ ਰਿਹੈ।
ਡਿਪਟੀ ਕਮਿਸ਼ਨ ਮਾਨਸਾ ਸ੍ਰੀ.ਅਮਿੱਤ ਢਾਕਾ ਦੇ ਅਦੇਸ਼ਾਂ ਤੇ ਖਰੀਦ ਮੰਡੀਆਂ ਚ ਬਿਜਲੀ,ਪਾਣੀ,ਪਖਾਨਿਆਂ ਸਮੇਤ ਹੋਰ ਮੁੱਢਲੀਆਂ ਸਹੂਲਤਾਂ ਮੁਹਈਆ ਕਰਵਾਏ ਜਾਣ ਦਾ ਭਾਂਵੇ ‘ਟੋਟਲ’ ਪੂਰਾ ਕੀਤਾ ਗਿਐ ਪਰ ਪੂਰਾ ਸੱਚ ਕੁਝ ਹੋਰ ਹੈ।ਅੱਜ ਜਦ ਪੱਤਰਕਾਰਾਂ ਨੇ ਹਲਕੇ ਦੇ ਅਨਾਜ ਖਰੀਦ ਕੇਦਰਾਂ ਦਾ ਦੌਰਾ ਕੀਤਾ ਤਾ ਸ਼ੇਰਖਾਂਵਾਲਾ,ਰਿਉਦਕਲਾਂ,ਬੀਰੇਵਾਲਾ ਡੋਗਰਾ ਆਦਿ ਪਿੰਡਾਂ ਚ ਪੀਣ ਵਾਲੇ ਪਾਣੀ ਦੇ ਪ੍ਰਬੰਧਾਂ ਵਜੋ ਰੱਖੇ ਪਾਣੀ ਵਾਲੇ ਘੜਿਆਂ ਉਪਰ ਗਿਲਾਸ ਤੱਕ ਨਹੀਂ ਸੀ ਅਤੇ ਬਦਲਵੇ ਪ੍ਰਬੰਧਾਂ ਚ ਸ਼ਰਾਬ ਦੀਆਂ ਖਾਲੀ ਬੋਤਲਾਂ ਕੱਟਕੇ ਰੱਖੀਆਂ ਦੇਖਣ ਨੂੰ ਮਿਲੀਆਂ।ਸ਼ੇਰਖਾਂ ਵਾਲਾ ਦੇ ਅਨਾਜ ਖਰੀਦ ਕੇਦਰ ਚ ਬੈਠੇ ਮੰਘਾਣੀਆਂ ਵਾਸੀ ਗੁਰਚਰਨ ਸਿੰਘ ਨੇ ਦੱਸਿਆ ਸਾਕਾਹਾਰੀ ਕਿਸਾਨਾਂ ਦਾ ਇਸ ਕੱਟੀ ਹੋਈ ਬੋਤਲ ਦੁਆਰਾ ਪਾਣੀ ਪੀਣ ਨਾਲ ਧਰਮ ਭ੍ਰਿਸਟ ਹੁੰਦੈ।ਇਸੇ ਤਰਾਂ ਪਖਾਨਿਆਂ ਦੇ ਪ੍ਰਬੰਧ ਵੀ ਕੇਵਲ ਨਾਮ ਦੇ ਹੀ ਹਨ।ਹਾਕਮ ਵਾਲਾ, ਮੰਦਰਾਂ, ਰਾਮਨਗਰ ਭੱਠਲ, ਮਲਕੋ, ਦਲੇਲ ਵਾਲਾ ਦੇ ਖਰੀਦ ਕੇਦਰਾਂ ਚ ਬਿਜਲੀ ਪ੍ਰਬੰਧਾਂ ਦੀ ਕਮੀ ਵੀ ਦੇਖਣ ਨੂੰ ਮਿਲੀ।ਰਾਮਨਗਰ ਭੱਠਲ ਚ ਕਣਕ ਲੈਕੇ ਆਏ ਮੱਲ ਸਿੰਘ ਵਾਲਾ ਵਾਸੀ ਬਲਵੀਰ ਸਿੰਘ ਨੇ ਦੱਸਿਆ ਕਿ ਮੰਡੀ ਚ ਬਿਜਲੀ ਲਈ ਜਰਨੇਟਰ ਤੱਕ ਦਾ ਪ੍ਰਬੰਧ ਨਹੀਂ ਹੈ।ਜਦ ਕਿ ਰਾਤ ਸਮੇ ਲੱਗਣ ਵਾਲੇ ਲੰਬੇ-ਲੰਬੇ ਬਿਜਲੀ ਕੱਟਾਂ ਦੌਰਾਨ ਕਣਕ ਦੀ ਰਾਖੀ ਬੈਠੇ ਕਿਸਾਨਾਂ ਨੂੰ ਰਾਤ ਰਾਤ ਭਰ ਜਾਗਣਾ ਪੈਦਾ ਹੈ।
ਕੀ ਕਹਿੰਦੇ ਹਨ ਅਧਿਕਾਰੀ:
ਇਸ ਪੂਰੇ ਮਾਮਲੇ ਬਾਰੇ ਜਦ ਮਾਰਕੀਟ ਕਮੇਟੀ ਬੋਹਾ ਦੇ ਸਕੱਤਰ ਸ੍ਰੀ. ਰਤਨ ਲਾਲ ਪੂਨੀਆਂ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਮੰਨਿਆਂ ਕਿ ਕੁਝ ਖਰੀਦ ਕੇਦਰਾਂ ਚ ਖਰੀਦ ਅਧਿਕਾਰੀਆਂ ਨੇ ਦੂਰੀ ਬਣਾਈ ਹੋਈ ਹੈ,ਜਿੰਨਾ ਬਾਰੇ ਉਨ੍ਹਾਂ ਉੱਚ ਅਧਿਕਾਰੀਆਂ ਨੂੰ ਜਾਣੂ ਵੀ ਕਰਵਾ ਦਿੱਤਾ ਹੈ।ਉਨ੍ਹਾਂ ਕਿਸਾਨਾਂ ਨੂੰ ਅਪੀਲ ਕੀਤੀ ਕਿ ਨਿਰਧਾਰਤ ਨਮੀ ਦੀ ਮਾਤਰਾ ਵਾਲੀ ਕਣਕ ਲੈਕੇ ਹੀ ਮੰਡੀ ਚ ਆਉਣ,ਫਿਰ ਵੀ ਜੇਕਰ ਕਿਸੇ ਕਿਸਾਨ ਨੂੰ ਅਨਾਜ ਮੰਡੀ ਚ ਕੋਈ ਦਿੱਕਤ ਆਂਉਦੀ ਹੈ ਤਾਂ ਉਹ ਆਪਣੀ ਸ਼ਿਕਾਇਤ ਮਾਰਕੀਟ ਕਮੇਟੀ ਨੂੰ ਫੋਨ ਵੀ ਦਰਜ ਕਰਾਉਣ।ਉਨਾਂ ਇਹ ਵੀ ਕਿਹਾ ਕਿ ਕੁਝ ਖਰੀਦ ਅਧਿਕਾਰੀਆਂ ਦੀਆਂ ਚੋਣ ਡਿਊਟੀਆਂ ਵੀ ਲੱਗੀਆਂ ਹੋਈਆਂ ਹਨ,ਜਿਹੜੇ ਸੈਟਰਾਂ ਨੂੰ ਪੂਰਾ ਸਮਾਂ ਨਹੀਂ ਦੇ ਰਹੇ।
