ਚੋਹਲਾ ਸਾਹਿਬ ਤੋਂ ਅਮਨਦੀਪ ਹਾਂਸ ਦੀ ਵਿਸ਼ੇਸ਼ ਰਿਪੋਰਟ :
ਇੰਜ ਲਗਦਾ ਏ ਮੇਰੇ ਕੋਲੋਂ
ਗੱਲ ਕੋਈ ਸੱਚੀ ਹੋ ਗਈ ਏ
ਤਾਹੀਓਂ ਕਰਨ ਸਵਾਗਤ ਮੇਰਾ
ਪੱਥਰ ਆਏ ਲੋਕਾਂ ਦੇ
ਉਹਨੂੰ ਕਹਿਣ ਦੀ ਲੋੜ ਨਹੀਂ ਬਾਬਾ
ਹੱਥ ਪਵਾਈਂ ਮੇਰੇ ਨਾਲ
ਇਸ ਧਰਤੀ ਤੇ ਜਿਹੜਾ ਬੰਦਾ
ਭਾਰ ਵੰਡਾਏ ਲੋਕਾਂ ਦੇ..
ਬਾਬਾ ਨਜ਼ਮੀ ਸਾਹਿਬ ਦੀਆਂ ਇਹਨਾਂ ਸਤਰਾਂ ਨਾਲ ਮਾਝੇ ਦੇ ਨਸ਼ੇ ਨਾਲ ਚਰੂੰਡੇ ਜਾ ਰਹੇ ਕੁਝ ਪਿੰਡਾਂ ਤੋਂ ਰਿਪੋਰਟ ਲੈ ਕੇ ਹਾਜ਼ਰ ਹਾਂ-
ਹਲਕਾ ਚੋਹਲਾ ਸਾਹਿਬ ਚੱਲਦੇ ਹਾਂ, ਵਿਧਾਨ ਸਭਾ ਚੋਣਾਂ ਤੋਂ ਐਨ ਪਹਿਲਾਂ ਇਸ ਹਲਕੇ ਦੇ ਪਿੰਡਾਂ ਦਾ ਦੌਰਾ ਕੀਤਾ ਸੀ ਤਾਂ ਉਦੋਂ ਵੀ ਇਥੇ ਨਸ਼ੇ ਨੂੰ ਲੈ ਕੇ ਬੁਰੇ ਹਾਲਾਤ ਸਨ, ਜਦੋਂ ਹਕੂਮਤ ਬਦਲੀ ਤਾਂ ਇਥੇ ਨਸ਼ੇ ਨਾਲ ਬਰਬਾਦ ਹੋ ਰਹੇ ਘਰਾਂ ਚ ਆਸ ਦਾ ਦੀਵਾ ਜਗਿਆ ਸੀ ਕਿ ਨਵਾਂ ਹਾਕਮ ਨਸ਼ੇ ਦੇ ਖਾਤਮੇ ਲਈ ਚੁੱਕੀ ਗੁਰੂ ਦੀ ਸਹੁੰ ਨੂੰ ਬੇਦਾਵਾ ਨਹੀਂ ਦੇਵੇਗਾ, ਪਰ ਉਹਨਾਂ ਘਰਾਂ ਚ ਤਾਂ ਸਗੋਂ ਹਨੇਰ ਹੋਰ ਚੌਣਾ ਹੋ ਗਿਆ। ਢਾਈ ਸਾਲ ਦੇ ਵਕਫੇ ਬਾਅਦ ਫੇਰ ਇਸ ਹਲਕੇ ਚ ਗਏ, ਹਾਲਾਤ ਹੋਰ ਗਰਕ ਗਏ।
ਮੌਜੂਦਾ ਪੰਜਾਬ ਸਰਕਾਰ ਵਲੋਂ ਨਸ਼ਾ ਛੁਡਾਉਣ ਲਈ ਨਸ਼ਾ ਖਤਮ ਕਰਨ ਲਈ ਨਿੱਤ ਨਵੇਂ ਐਲਾਨ ਹੋ ਰਹੇ ਨੇ, ਕਦੇ ਪਿੰਡਾਂ ਚ ਮੀਟਿਂਗਾਂ ਦਾ ਦੌਰ ਚਲਾਇਆ ਜਾਂਦਾ ਹੈ, ਕਦੇ ਨਸ਼ੇੜੀਆਂ ਨੂੰ ਫੜ ਫੜ ਕੇ ਜੇਲਾਂ ਚ ਤੁੰਨਣ ਦੀ ਮੁਹਿੰਮ ਤੁਰ ਪੈਂਦੀ ਹੈ, ਕਦੇ ਨਸ਼ੇ ਦਾ ਮੁਫਤ ਇਲਾਜ ਕਰਵਾਉਣ ਲਈ ਕੋਈ ਮੁਹਿੰਮ ਚੱਲ ਪੈਂਦੀ, ਪਰ ਅਮਲ ਭਾਵ ਨਸ਼ੇ ਚੋਂ ਪੰਜਾਬ ਨੂੰ ਕੱਢਣ ਲਈ ਕਿਸੇ ਵੀ ਐਲਾਨ ਤੇ ਸਾਫ ਨੀਅਤ ਨਾਲ ਅਮਲ ਨਹੀਂ ਹੁੰਦਾ, ਚਲਾਈਆਂ ਜਾ ਰਹੀਆਂ ਨਿੱਤ ਨਵੀਂਆਂ ਨਸ਼ਾ ਛੁਡਾਊ ਮੁਹਿੰਮਾਂ ਨੇ ਸਗੋਂ ਮੈਡੀਕਲ ਨਸ਼ਾ ਵਧਾ ਦਿਤਾ। ਡੈਪੋ ਮੁਹਿੰਮ ਨਿਰਾ ਡਰਾਮਾ ਸਿੱਧ ਹੋ ਰਹੀ ਹੈ। ਮਾਝੇ ਦੇ ਪਰਸ਼ਾਸਨਕ ਅਧਿਕਾਰੀਆਂ ਵਲੋਂ ਅਖਬਾਰੀ ਬਿਆਨ ਦਾਗੇ ਜਾ ਰਹੇ ਨੇ ਕਿ ਪਿੰਡਾਂ ਦੇ ਪਿੰਡ ਨਸ਼ਾ ਮੁਕਤ ਕਰ ਦਿੱਤੇ ਗਏ ਨੇ, ਪਰ ਨਸ਼ੇ ਨਾਲ ਮੌਤ ਦੇ ਮੂੰਹ ਪੈ ਰਹੇ ਜਵਾਨਾਂ ਦੇ ਮਾਪੇ ਆਖਦੇ ਨੇ ਕਿ ਸਾਡੇ ਪਿੰਡਾਂ ਚ ਫੇਰੀ ਤਾਂ ਪਾਓ ਹਾਲਾਤ ਦਾ ਪਤਾ ਲੱਗ ਜਾਊ।
ਤਰਨਤਾਰਨ ਜ਼ਿਲ੍ਹੇ ਦੇ ਪਿੰਡ ਕੋਟਦਾਤਾ, ਰੱਤਾ ਗੁੱਦਾ, ਦਦੇਹਰ ਸਾਹਿਬ, ਗੰਡੀਵਿੰਡ, ਬਰਵਾਲਾ, ਖਾਰਾ ਦਾ ਦੌਰਾ ਕੀਤਾ, ਤਾਂ ਗਲੀਆਂ ਚ ਥਾਂ ਥਾਂ ਵਿਹਲੜ ਮੁੰਡੇ ਖੜੇ ਆਮ ਹੀ ਦਿਸਦੇ ਨੇ, ਪਹਿਲੀ ਨਜ਼ਰੇ ਹੀ ਅੰਦਾਜ਼ਾ ਲਾ ਸਕਦੇ ਹੋ ਕਿ ਇਹ 16-17 ਸਾਲ ਤੋਂ ਲੈ ਕੇ 20-22 ਸਾਲ ਦੀ ਉਮਰ ਦੇ ਮੁੰਡੇ ਸੋਫੀ ਨਹੀਂ।
ਜਦੋਂ ਇਹਨਾਂ ਦੇ ਘਰਾਂ ਚ ਵੜੋ ਤਾਂ ਮਾਵਾਂ ਦੁਹਥੜੀ ਪਿਟਦੀਆਂ ਨੇ-
ਨਖੱਤਿਆਂ ਨੇ ਸਾਡੇ ਮੁੰਡਿਆਂ ਦੀ ਡਂਡ ਲਾਹ ਛੱਡੀ ਜੂ…
ਕੁੱਤੀ ਚੋਰਾਂ ਨਾਲ ਰਲੀ ਹੋਈ ਜੇ
ਸਾਡੇ ਪਿੰਡਾਂ ਚ ਜਿੰਨਾ ਮਰਜ਼ੀ ਚਿੱਟਾ, ਗੋਲੀਆਂ, ਕੈਪਸੂਲ ਟੀਕੇ ਲੈ ਲਓ, ਸਾਡੇ ਪਿੰਡਾਂ ਚ ਡਾਕਟਰੀ ਦੀਆਂ ਦੁਕਾਨਾਂ ਪਾ ਕੇ ਬੈਠੇ ਕੁਝ ਬੰਦੇ ਸਾਡੀਆਂ ਜੜਾਂ ਪੱਟੀ ਜਾਂਦੇ ਨੇ, ਕੋਈ ਪੁਛਣ ਵਾਲਾ ਨਹੀਂ।
ਕੋਟਦਾਤਾ ਪਿੰਡ ਚ ਇਕ ਮਾਂ ਨੇ ਤਾਂ ਨਸ਼ੇ ਨਾਲ ਡੱਕੇ ਪੁੱਤ ਦੇ ਸਾਹਮਣੇ ਹੀ ਕਿਹਾ ਕਿ ਇਹਦੀਆਂ ਜੇਬਾਂ ਫਰੋਲੋ, ਥੱਬਾ ਗੋਲੀਆਂ ਨਿਕਲਣਗੀਆਂ, ਟਰੈਮਾਡੋਲ ਦੀਆਂ ਗੋਲੀਆਂ ਖਾਂਦਾ, 21 ਵਰਿਆਂ ਦਾ ਇਹ ਮੁੰਡਾ ਲੰਘੇ ਜੂਨ ਦੇ ਮਹੀਨੇ ਮਸਾਂ ਈ ਬਚਿਆ ਸੀ, ਖਂਘ ਬੁਖਾਰ ਦੀ ਦਵਾਈ ਲੈਣ ਲਈ ਮਾਂ ਤੋਂ 1੦੦ ਰੁਪਿਆ ਲਿਆ ਤੇ ਕਿਸੇ ਆਰ ਐਮ ਪੀ ਤੋਂ ਨਸ਼ੇ ਦਾ ਟੀਕਾ ਲਵਾ ਆਇਆ, ਘਰ ਆ ਕੇ ਬੇਹੋਸ਼ ਹੋ ਗਿਆ, ਸਾਰਾ ਸਰੀਰ ਕਾਲਾ ਪੈ ਗਿਆ, ਮਂਜੇ ਤੇ ਪਿਆ ਬੁੜਕੇ, ਮਾਂ ਧੀ ਮਸਾਂ ਸਕੂਟਰ ਤੇ ਧੂਹ ਕੇ ਇਕ ਜਾਣਕਾਰ ਡਾਕਟਰ ਕੋਲ ਲੈ ਕੇ ਗਈਆਂ, ਉਹ ਦਾਖਲ ਨਾ ਕਰੇ, ਕਿ ਨਸ਼ਾ ਵਧ ਕੀਤਾ ਹੋਇਆ, ਇਹਨੇ ਨਹੀਂ ਬਚਣਾ, ਮਾਂ ਨੇ ਤਰਲੇ ਕੀਤੇ, ਤਾਂ ਡਾਕਟਰ ਨੇ ਦਵਾ ਦਾਰੂ ਕੀਤੀ, ਮੁਂਡਾ ਬਚ ਗਿਆ, ਜਦੋਂ ਅਸੀਂ ਇਹਨਾਂ ਦੇ ਘਰ ਗਏ ਓਸ ਵਕਤ ਵੀ ਗੋਲੀਆਂ ਦਾ ਥੱਬਾ ਉਹਦੀ ਜੇਬ ਚ ਸੀ, ਮਾਂ ਤੜਪਦੀ ਹੈ ਕਿ ਟਰੈਮਾਡੋਲ ਦੀਆਂ ਵੀਹ ਗੋਲੀਆਂ ਇਕ ਵੇਲੇ ਖਾ ਲੈਂਦਾ, ਕਈ ਵੇਰ ਐਲਪਰੈਕਸ ਦੀਆਂ ਗੋਲੀਆਂ ਵੀ ਥੱਬਾ ਸਾਰਾ ਚੁਕੀ ਫਿਰਦੈ।
ਸਾਡੇ ਤਾਂ ਕਈ ਮੁਂਡੇ ਚਾਲੀ ਪੰਤਾਲੀ ਗੋਲੀਆਂ ਵੀ ਦਿਨ ਚ ਈ ਖਾ ਜਾਂਦੇ ਨੇ।
ਟਰੈਮਾਡੋਲ ਤੇ ਐਲਪਰੈਕਸ ਪੀਹ ਕੇ ਡਿਸਟਿਲਡ ਵਾਟਰ ਚ ਘੋਲ ਕੇ ਟੀਕੇ ਲਾਏ ਜਾਂਦੇ ਨੇ।
ਇਹ ਜ਼ਹਿਰ ਇਹਨਾਂ ਨੂੰ ਕਿਨਾ ਚਿਰ ਜਿਉਂਦੇ ਰੱਖੂ..
ਕੋਟਦਾਤਾ, ਖਾਰਾ, ਬਰਵਾਲਾ, ਰੱਤਾ ਗੁੱਦਾ, ਗੰਡੀਵਿੰਡ ਪਿੰਡਾਂ ਚ ਵੀ ਨਸ਼ਾ ਕਿਥੋਂ ਲੈਂਦੇ ਨੇ .. ਇਸ ਸਵਾਲ ਤੇ ਜੁਆਬ ਮਿਲਦਾ ਹੈ- ਜਿਥੋਂ ਮਰਜ਼ੀ ਲੈ ਲਓ, ਜੇਬ ਚ ਪੈਸਾ ਚਾਹੀਦਾ। ਇਕ ਗਰਾਮ ਚਿੱਟਾ ਤਿਂਨ ਹਜ਼ਾਰ ਦਾ ਆਉਂਦਾ, ਕਈਆਂ ਨੇ ਤਾਂ ਚਿੱਟੇ ਦੀ ਥਾਂ ਨੀਲਾ ਥੋਥਾ ਵੇਚ ਕੇ ਮੁਂਡੇ ਮਾਰ ਛੱਡੇ। ਸਰਕਾਰ ਨੇ ਸਰਿਂਜਾਂ ਬਿਨਾ ਡਾਕਟਰ ਦੀ ਪਰਚੀ ਦੇ ਵੇਚਣ ਤੇ ਪਾਬੰਦੀ ਲਾਈ ਹੈ, ਪਰ ਸਾਡੇ ਪਿਂਡਾਂ ਚ ਸਰਿਂਜਾਂ ਜਿਂਨੀਆਂ ਮਰਜ਼ੀ ਲੈ ਲਓ.. ਇਕੋ ਹੀ ਸਰਿਂਜ ਵਰਤੀ ਜਾਂਦੇ ਨੇ, ਕਾਲਾ ਪੀਲੀਆ ਫੈਲਿਆ ਪਿਆ ਹੈ। ਹੋਰ ਕੋਈ ਮਾੜਾ ਰੋਗ ਵੀ ਹੋਊ, ਮਾਵਾਂ ਦਾ ਇਸ਼ਾਰਾ ਏਡਜ਼ ਵੱਲ ਹੈ।
ਬਰਵਾਲਾ ਪਿੰਡ ਚ ਲੰਘੇ ਇਕ ਮਹੀਨੇ ਚ ਨਸ਼ੇ ਦੀ ਓਵਰਡੋਜ਼ ਨਾਲ ਅੱਠ ਜਵਾਨ ਮੁਂਡੇ ਮਰ ਗਏ, ਤੇ ਇਲਾਕੇ ਦਾ ਪਰਸ਼ਾਸਨ ਇਸ ਪਰਚਾਰ ਤੇ ਜ਼ੋਰ ਲਾਈ ਜਾਂਦੈ ਕਿ ਨਸ਼ਾ ਮੁਕਤ ਹੋ ਗਏ ਪਿੰਡ।ਹਾਂ ਵਾਕਿਾ ਹੀ ਨਸ਼ਾ ਮੁਕਤ ਹੋ ਗਏ।
ਇਕ ਇਕ ਘਰ ਦੇ ਦੋ ਦੋ ਪੁੱਤ ਵੀ ਨਸ਼ੇ ਚ ਲਿਪਤ ਨੇ, ਬਰਬਾਦੀ ਤੈਅ ਹੈ।
ਚੋਹਲਾ ਸਾਹਿਬ ਕਸਬੇ ਚ ਇਕ ਘਰ ਚ ਦੋ ਭਰਾਵਾਂ ਤੇ ਪਿਓ ਨੂ ਨਸ਼ਾ ਨਿਗਲ ਗਿਆ ਹੈ, ਤੀਜਾ ਪੁੱਤ ਵੀ ਨਸ਼ੇ ਚ ਗਰਕਿਆ ਪਿਆ ਹੈ, ਨਸ਼ਾ ਨਾ ਮਿਲੇ ਤਾਂ ਮਾਂ ਦੀ ਕੁਟਮਾਰ ਕਰਦਾ ਹੈ, ਬੁਢਡ਼ੀ ਮਾਂ ਜਿਉਂਦੇ ਪੁੱਤ ਲਈ ਵੀ ਵੈਣ ਪਾਉਂਦੀ ਜਰ ਨਹੀਂ ਹੁੰਦੀ।
ਪਰ ਹਕੂਮਤ ਸਭ ਜਰ ਰਹੀ ਹੈ.. ਕਿੱਡਾ ਜੇਰਾ ਹੈ ਐਨ ਮਹਾਰਾਜਿਆਂ ਵਰਗਾ…
ਇਥੇ ਤਰਨਤਾਰਨ ਜ਼ਿਲ੍ਹੇ ਦੇ ਪਿੰਡਾਂ ਦੀਆਂ ਆਸ਼ਾ ਵਰਕਰਾਂ ਨੂੰ ਨਸ਼ਾ ਮੁਕਤੀ ਮੁਹਿੰਮ ਲਈ ਸਰਕਾਰ ਕੰਮ ਤੇ ਲਾਉਂਦੀ ਹੈ। ਐਸ ਐਮ ਓ ਫਰਮਾਨ ਜਾਰੀ ਕਰਦਾ ਹੈ ਕਿ ਆਸ਼ਾ ਵਰਕਰਾਂ ਘਰੋ ਘਰੀ ਜਾਣ, ਨਸ਼ਾ ਕਰਨ ਵਾਲਿਆਂ ਨੂੰ ਨਸ਼ਾ ਨਾ ਕਰਨ ਲਈ ਪਰੇਰਿਤ ਕਰਨ, ਇਸ ਬਾਰੇ ਆਸ਼ਾ ਵਰਕਰਾਂ ਨੇ ਕਿਹਾ ਕਿ ਸਾਥੋਂ ਤਾਂ ਆਪਣੇ ਪੁੱਤ ਪਤੀ ਨਹੀਂ ਸਮਝਾਏ ਜਾਂਦੇ, ਬੇਗਾਨਿਆਂ ਤੋਂ ਅਸੀਂ ਜੁੰਡੇ ਪਟਵਾਉਂਣੇ ਆ, ਸਰਕਾਰ ਸਾਨੂਂ ਚਾਹੇ ਨੌਕਰੀਓਂ ਕੱਢ ਦੇਵੇ, ਆਹ ਕੰਮ ਅਸੀਂ ਨਹੀਂ ਕਰ ਸਕਦੀਆਂ।
ਪਿਛਲੇ ਦਿਨੀਂ ਸਿਹਤ ਮੰਤਰੀ ਦਾ ਤਰਨਤਾਰਨ ਜ਼ਿਲ੍ਹੇ ਦਾ ਦੌਰਾ ਸੀ, ਜੋ ਸਮਾਗਮ ਹੋਣਾ ਸੀ, ਉਹ ਵੀ ਨਸ਼ਾ ਮੁਕਤ ਪੰਜਾਬ ਨਾਲ ਜੁੜਿਆ ਸੀ, ਆਸ਼ਾ ਵਰਕਰਾਂ ਦੀ ਡਿਊਟੀ ਲਾਈ ਗਈ ਕਿ ਆਪਣੇ ਨਾਲ ੧੦ – ੧੦ ਨਸ਼ੇੜੀ ਲੈ ਕੇ ਆਇਓ, ਆਸ਼ਾ ਵਰਕਰਾਂ ਨੇ ਕਿਹਾ ਕਿ ਕੋਈ ਸਰਕਾਰ ਨੂੰ ਪੁੱਛੇ ਬਈ, ਕਿਹੜਾ ਨਸ਼ੇੜੀ ਇਉਂ ਨਾਲ ਤੁਰ ਪਊ?
ਸਰਕਾਰ ਦੇ ਐਲਾਨ, ਮੁਹਿੰਮਾਂ ਸਿਰਫ ਮੀਡੀਆ ਚ ਪਰਾਪੇਗੰਡਾ ਕਰਕੇ ਦੁਨੀਆ ਨੂੰ ਦਿਖਾਉਣਾ ਹੈ , ਨਸ਼ੇ ਦੇ ਖਿਲਾਫ ਲਾਲਾ.. ਲਾਲਾ.. ਕਰਨੀ ਹੈ, ਜਿੰਨੇ ਐਲਾਨ ਕੈਪਟਨ ਸਰਕਾਰ ਨੇ ਕੀਤੇ, ਜੇ ਇਕ ਤੇ ਵੀ ਇਮਾਨਦਾਰੀ ਨਾਲ ਅਮਲ ਕੀਤਾ ਹੁੰਦਾ ਤਾਂ ਨਸ਼ਾ ਖਤਮ ਨਾ ਸਹੀ, ਘੱਟ ਜ਼ਰੂਰ ਜਾਂਦਾ ..
ਉੱਜੜ ਰਹੇ ਘਰਾਂ ਚ ਵਕਤੋਂ ਪਹਿਲਾਂ ਬੁੱਢੀਆਂ ਹੋ ਰਹੀਆਂ ਮਾਂਵਾਂ ਦੱਸਦੀਆਂ ਨੇ ਕਿ ਘਰੋਂ ਜੇ ਪੈਸੇ ਨਹੀਂ ਮਿਲਦੇ ਤਾਂ ਔਂਤਰੇ ਚੋਰੀਆਂ ਕਰਦੇ ਨੇ, ਆਹ ਸਾਡੇ ਪਿੰਡਾਂ ਚ ਦੁਪਹਿਰੇ ਕੋਈ ਤੀਮੀ ਇਕਲੀ ਸੁੰਝੀ ਬੀਹੀ ਚੋਂ ਨੀਂ ਲੰਘ ਸਕਦੀ, ਜੈਖਣੇ ਮੂੰਹ ਸਿਰ ਵਲੇਟ ਕੇ ਪਰਸ, ਵਾਲੀਆਂ, ਫੂਨ ਜੋ ਵੀ ਹੱਥ ਲੱਗੇ ਖੋਹ ਕੇ ਲੈ ਜਾਂਦੇ ਨੇ।
ਟਰਾਂਸਫਾਰਮਰਾਂ ਦਾ ਤੇਲ ਕੱਢ ਕੇ ਵੇਚ ਦਿੰਦੇ ਨੇ,
ਇਹ ਤਾਂ ਕਿਸੇ ਦਾ ਕੌਲੀ ਗਲਾਸ ਨਹੀਂ ਬਾਹਰ ਪਿਆ ਛੱਡਦੇ।
ਸਾਡੇ ਤਾਂ ਅਮਲ ਪੂਰਾ ਕਰਨ ਖਾਤਰ ਜੈ ਖਾਣਿਆਂ ਨੇ ਅਚਾਰੀ ਅੰਬਾਂ ਦੇ ਬੂਟੇ ਤੋਂ ਸਾਰਾ ਫਲ ਰਾਤੋ ਰਾਤ ਲਾਹ ਲਿਆ, ਵੇਚ ਕੇ ਨਸ਼ਾ ਕਰ ਗਏ।
ਤਰਨਤਾਰਨ ਜਿੱਥੇ ਡੀ ਸੀ ਰਹਿੰਦਾ, ਓਹਦੇ ਘਰ ਦੇ ਕੋਲ ਤਾਂ ਸ਼ਰੇਆਮ ਲੁੱਟਾਂ ਖੋਹਾਂ ਹੋਈ ਜਾਂਦੀਆਂ ਨੇ, ਆਵਦਾ ਨੱਕ ਤਾਂ ਬਚਾਅ ਨਹੀਂ ਹੁੰਦਾ, ਪਿੰਡਾਂ ਦਾ ਕੀ ਸਮਾਰ ਲੈਣਗੇ ਅਫਸਰ।
ਮਾਵਾਂ ਆਖਦੀਆਂ ਨੇ ਸਾਡੇ ਪਿਂਡਾਂ ਚ ਨਸ਼ਾ ਵੇਚਣ ਵਾਲਿਆਂ ਤੇ ਕਾਰਵਾਈ ਕਰਨ ਲਈ ਕਦੇ ਵੀ ਪੁਲਸ ਨਹੀਂ ਆਈ, ਕਦੇ ਕਿਸੇ ਮੋਹਤਬਰ ਨੇ ਕੋਈ ਸਖਤੀ ਨਾਲ ਪੈਰ ਨਹੀਂ ਪੁੱਟਿਆ, ਸਭ ਜਾਣਦੇ ਨੇ ਕਿ ਕੌਣ ਨਸ਼ਾ ਕਰਦਾ ਹੈ ਤੇ ਕੌਣ ਵੇਚਦਾ ਹੈ, ਸਾਡੇ ਤਾਂ ਕਈ ਬੁਡ਼ੀਆਂ ਸੁੱਥਣਾਂ ਦੇ ਨੇਫਿਆਂ ਚ ਚਿੱਟੇ ਦੀਆਂ ਪੁੜੀਆਂ, ਗੋਲੀਆਂ, ਕੈਪਸੂਲ ਲੁਕੋ ਕੇ ਸਪਲਾਈ ਕਰਨ ਜਾਂਦੀਆਂ ਨੇ।
ਇਦੂੰ ਵੱਧ ਹੋਰ ਕੀ ਗਰਕਣਾ ਇਹਨਾਂ ਨੇ .. ..
ਮਾਝੇ ਦੀ ਅਣਖ ਇਹਨਾਂ ਬੋਲਾਂ ਚ ਨਹੀਂ ਧੜਕਦੀ, ਦਰਦਾਂ ਹੇਠ ਮਧੋਲੀ ਪਈ ਸਿਸਕਦੀ ਹੈ।
ਗੋਇੰਦਵਾਲ ਸਾਹਿਬ ਤੋਂ ਸਰਹਾਲੀ ਨੂੰ ਜਾਂਦੀ ਸੜਕ ਦੁਆਲੇ ਸ਼ਾਮਾਂ ਪਈਆਂ ਤੋਂ ਨਸ਼ੇੜੀਆਂ ਦੇ ਝੁੰਡ ਜੁੜਦੇ ਨੇ, ਕੁਝ ਸੜਕ ਤੇ ਸ਼ਰੇਆਮ ਖਲੋਅ ਕੇ ਤੇ ਕੁਝ ਝਾੜੀਆਂ ਦੇ ਉਹਲੇ ਬਹਿ ਕੇ ਟੀਕੇ ਲਾਉਂਦੇ, ਸੂਟੇ ਲਾਉਂਦੇ, ਖਹਿਬੜਦੇ ਆਮ ਹੀ ਦਿਸ ਜਾਂਦੇ ਨੇ।
ਪਰ ਹਾਂ, ਇਹ ਸਿਰਫ ਜਾਗਦੀ ਅੱਖ ਨੂ ਦਿਸਦੇ ਨੇ, ਮੁਰਦਾ ਜ਼ਿਹਨ ਢੋਅ ਰਹੇ ਲੋਕਾਂ ਲਈ ਸਾਉਣ ਦੇ ਅੰਨੇ ਵਾਂਗ ਸਭ ਹਰਾ ਹਰਾ ਹੈ..
ਨਸ਼ੇ ਚ ਗਰਕਦੇ ਜਾ ਰਹੇ ਜਵਾਨਾਂ ਲਈ ਨਾ ਸਹੀ, ਨਸ਼ੇ ਤੋਂ ਬਚਿਆਂ ਨੂੰ ਬਚਾਉਣ ਲਈ ਕੋਈ ਤਾਂ ਬੋਲੇ.. ਪਰ ਨਹੀਂ, ਇਥੇ ਤਾਂ ਸਭ ਪਾਸੇ ਡਰਾਉਣੀ ਚੁੱਪ ਪੱਸਰੀ ਹੋਈ ਹੈ।
ਜੇ ਜੁ਼ਲਮ ਕਰਨਾ ਪਾਪ ਹੈ, ਤਾਂ ਜੁਲਮ ਸਹਿਣਾ ਵੀ ਪਾਪ ਹੈ, ਗੁਰੂ ਸਾਹਿਬ ਦੀ ਸਿੱਖਿਆ ਹੈ, ਪਰ ਇਹਦੇ ਉਤੇ ਅਮਲ ਕਰਨ ਵਾਲਾ ਪੰਥ ਖਾਮੋਸ਼ ਹੈ..।
ਹਾਕਮ ਤਾਂ ਹੈ ਹੀ ਘੁੰਨਾ ਤੇ ਕਾਲੀ ਕਮਾਈ ਦੇ ਲਾਲਚ ਚ ਪਿਆ ਪਰਸ਼ਾਸਨ ਦਾ ਵੱਡਾ ਹਿੱਸਾ ਬੇਈਮਾਨ ਹੈ, ਅਜਿਹੇ ਚ ਪੰਜਾਬ ਦਾ ਕੌਣ ਵਾਲੀਵਾਰਸ ਹੈ?
ਸੱਚ ਜਾਣਿਓ ਮਾਝੇ ਦੀ ਫਿਜ਼ਾ ਚ ਹੁਣ ਅਣਖ ਨਹੀਂ ਫਰਕਦੀ, ਨਸ਼ਾ ਉਛਾਲੇ ਮਾਰਦਾ ਹੈ, ਅਣਖ ਤਾਂ ਖੌਰੇ ਆਖਰੀ ਸਵਾਸਾਂ ’ਤੇ ਹੋਵੇ..
ਸੁਥਰੇ ਤਾਂ ਕਹਿਣਗੇ ਕਿ ਸਭ ਝੂਠ ਆ, ਪਰ ਅਸੀਂ ਤਾਂ ਏਹੀ ਕਹਿਣਾ ਹੈ-
ਵੇਖੇ ਭਾਵੇਂ ਨਾ ਉਹ ਵੇਖੇ
ਇਹ ਤੇ ਉਹਦੀ ਮਰਜ਼ੀ ਏ
ਮੇਰਾ ਕੰਮ ਸੀ ਸ਼ੀਸ਼ਾ ਧਰਨਾ
ਸ਼ੀਸ਼ਾ ਧਰ ਕੇ ਮੁੜਿਆ ਵਾਂ..
