ਹਨੇਰਿਆਂ ਵਿਚ – ਹਰਜਿੰਦਰ ਸਿੰਘ ਗੁਲਪੁਰ

ਰੂਪ ਧਾਰ ਕੇ ਸ਼ਾਤਰ ਸਪੇਰਿਆਂ ਦਾ,
ਫੇਰ ਰੱਸੀਓ ਸੱਪ ਬਣਾਉਣ ਚੱਲੇ

ਰਾਜਨੀਤੀ ਨੂੰ ਧਰਮ ਦਾ ਲਾ ਟਿੱਕਾ,
ਆਮ ਲੋਕਾਂ ਨੂੰ ਔਝੜੇ ਪਾਉਣ ਚੱਲੇ

ਸੁਤੇ ਰਖਣ ਦੇ ਲਈ ਸਰੋਤਿਆਂ ਨੂੰ,
ਕਾਲੇ ਕੋਹਾਂ ਦੀ ਕਥਾ ਸੁਣਾਉਣ ਚੱਲੇ

ਰੀਸ ਕਰਕੇ “ਯੋਧੇ”,ਸਿਕੰਦਰਾਂ ਦੀ,
ਆਸੇ ਪਾਸੇ ਦੇ ਕਿੰਗਰੇ ਢਾਉਣ ਚੱਲੇ

ਆਪਣੇ ਘਰੀਂ ਜੋ ਹਸਦੇ ਖੇਡਦੇ ਨੇ,
ਬਾਹਰ ਕਢ ਕੇ ਦੇਖੋ ਰੁਆਉਣ ਚੱਲੇ

ਰੀਝ ਗਏ ਨੇ ਵੱਜਦੀਆਂ ਤਾੜੀਆਂ ਤੇ,
ਪੂਰੇ ਮੁਲਖ ਦੀ ਪਿਠ ਲਵਾਉਣ ਚੱਲੇ

ਘਰ ਵਾਪਸੀ ਕਰਨ ਦੇ ਨਾਂ ਥੱਲੇ,
ਸਾਰੇ ਦੇਸ਼ ਦੀ ਚੂਲ ਹਲਾਉਣ ਚੱਲੇ

ਇੱਕ ਰੰਗ ਦਾ ਕੋਈ ਨੀ ਬਾਗ ਹੁੰਦਾ,
ਕੋਈ ਦੇਸ਼ ਨੀ ਧੱਕੇ ਦੇ ਨਾਲ ਚਲਦਾ,
ਸਦਾ ਸਦਾ ਬਗਾਵਤਾਂ ਹੁੰਦੀਆਂ ਨੇ
ਰਹੇ ਦੀਪ ਹਨੇਰਿਆਂ ਵਿਚ ਬਲਦਾ