ਗ਼ਜ਼ਲ -ਜਸਵੰਤ ਧਾਪ

ਕੀ ਬੰਦਾ ਤੇ ਕੀ ਬੰਦੇ ਦਾ ਬਾਣਾ ਏ
ਇਕ ਦਿਨ ਮਿੱਟੀ ਨੇ ਮਿੱਟੀ ਹੋ ਜਾਣਾ ਏ

ਬੁੱਤ ਬਣਾ ਕੇ ਸਾੜੀ ਜਾਓ ਰਾਵਣ ਦੇ
ਸੋਚਾਂ ਵਿਚਲਾ ਰਾਵਣ ਅੱਗਾਂ ਖਾਣਾ ਏ

ਪੁੱਛ ਪਵਾਈ ਓਹਨੇ ਗੈਬੀ ਬਾਬੇ ਤੋਂ
ਕਿਸੇ ਦੀ ਕੁਰਬਾਨੀ ਤੇ ਪੁੱਤਰ ਆਣਾ ਏ

ਮਿੱਠੀਆਂ ਗੋਲਾਂ ਹਨ ਸਾਡੇ ਸ਼ਹਿਤੂਤ ਦੀਆਂ
ਐਪਰ ਭਲਕੇ ਇਹ ਵੀ ਵੱਢਿਆ ਜਾਣਾ ਏ

ਬੇੜੀ ਹੈ ਕਾਗਜ਼ ਦੀ ਸਾਗਰ ਲਹੂਆਂ ਦਾ
ਮਾਜੀ ਸਾਨੂੰ ਭੰਵਰਾਂ ਵਿਚ ਫਸਾਣਾ ਏ

ਮੁੱਲਾਂ ਕਾਜੀ ਭਾਈ ਅਤੇ ਪੁਜਾਰੀ ਨੇ
ਰੱਬ ਨੂੰ ਮੰਤਰ ਭਿੱਖਿਆ ਦਾ ਸਮਝਾਣਾ ਏ

ਵੱਡਾ ਕੀਤਾ ਬੁੱਢਾ ਉਹਨਾ ਨੱਕ ਲਈ
ਪੁੱਤਾਂ ਪੋਤਰਿਆਂ ਨੇ ਕਰਜ਼ ਚੁਕਾਣਾ ਏ

ਧਾਪ ਛੇੜ ਨਾ ਚਰਚਾ ਦੋਜ਼ਖ ਬਹਿਸ਼ਤ ਦੀ
ਚੰਗੇ ਕਰਮਾਂ ਆਪੇ ਪੰਧ ਮੁਕਾਣਾ ਏ