ਆ, ਦੋ ਟੁੱਕ ਫੈਸਲਾ ਕਰੀਏ – ਕੁਲਦੀਪ ਸਿੰਘ ਘੁਮਾਣ

ਕੀ ਫਿਰ ਕਿਸੇ ਕਹਿਣੀ ਤੇ ਕਥਨੀ ਦੇ ਸੂਰੇ,
ਗੁਰੂ ਕੇ ਸਿੱਖ ਨੂੰ,
ਲਗਾਤਾਰ 44 ਦਿਨ,
ਭੁੱਖ ਹੜਤਾਲ ਤੇ ਤਾਂ ਨਹੀਂ ਬਹਿਣਾ ਪਵੇਗਾ?

ਕੀ ਮਚਲੀ ਸਿਆਸਤ,
ਫਿਰ ਕਿਸੇ ਸ.ਗੁਰਬਖਸ਼ ਸਿੰਘ ਦੇ,
ਦਿ੍ਰੜ ਇਰਾਦੇ ਅਤੇ ਵਿਸ਼ਵਾਸ ਦਾ,
ਚੀਰ ਹਰਨ ਤਾਂ ਨਹੀਂ ਕਰੇਗੀ?

ਕੀ ਇੱਕ ਰੁਪਈਏ ਕਿੱਲੋ ਆਟੇ ਦੇ ਹੱਕ ਤੋਂ,
ਅਗਾਂਹ ਵੱਧਦੀ ਹੋਈ ਸਿਆਸਤ,
ਗਰੀਬ ਲੋਕਾਂ ਨੂੰ,
ਮਾਣ ਨਾਲ ਕੰਮ ਕਰਨ ਦਾ ਹੱਕ ਦੇਵੇਗੀ?

ਕੀ ਪੰਚਾਇਤਾਂ ਦੇ ਵਿਰੋਧ ਕਰਨ ਦੇ ਬਾਵਜੂਦ ,
ਹਾਕਮ ਧਿਰ,
ਧੱਕੇ ਨਾਲ ਠੇਕੇ ਖੁਲਵਾਉਣ ਦੇ ਅਮਲ ਨੂੰ ਇਸੇ ਤਰ੍ਹਾਂ ਜਾਰੀ ਰੱਖੇਗੀ?

ਕੀ ਇਹ ਸਟੰਟਬਾਜ਼ਾਂ ਦੀ ਦੁਨੀਆਂ,
ਨਵੇਂ ਵਰ੍ਹੇ ਵਿਚ ਸਟੰਟ ਕਰਨੋਂ ਬਾਜ ਆ ਜਾਵੇਗੀ?

ਕੀ ਆਮ ਲੋਕਾਂ ਦਾ,
ਏਸੇ ਤਰ੍ਹਾਂ ਹੀ ਸ਼ੋਸ਼ਣ ਹੁੰਦਾ ਰਹੇਗਾ?
ਜਾਂ ਫਿਰ ਕੋਈ ਉਠੇਗਾ ਨਵਾਂ ਕੇਜਰੀਵਾਲ?

ਭਲਾ ਤੂੰ ਹੀ ਦੱਸ?
ਸਮੇਂ ਦੇ ਮੱਥੇ ‘ਤੇ ਲਿਖਿਆ ਹੋਇਆ ਸੱਚ ,
ਬਦਲ ਜਾਵੇਗਾ ?

ਹਾਮੀ ਕਿਉਂ ਨਹੀਂ ਭਰਦਾ?
ਜੇ ਨਹੀਂ!
ਤੇ ਫਿਰ ਭਲਾ ਕਾਹਦਾ ਹੋਇਆ,
ਨਵਾਂ ਸਾਲ ਮੁਬਾਰਕਬਾਦ!

ਆ,
ਦੋ ਟੁੱਕ ਫੈਸਲਾ ਕਰੀਏ,
ਜਦੋਂ ਤੱਕ,
ਕੋਈ ਨਵਾਂ ਕੇਜਰੀਵਾਲ ਨਹੀਂ ਆਉਂਦਾ।
ਅਸੀਂ ਨਹੀਂ ਕਹਾਂਗੇ,
ਨਵਾਂ ਸਾਲ ਮੁਬਾਰਕਬਾਦ।