ਕੀ ਠਿਕਾਣਾ ਮੇਰਾ ਯਾਰਾ
ਅੱਜ ਏਸ ਸ਼ਹਿਰ, ਕੱਲ੍ਹ ਓਸ ਸ਼ਹਿਰ
ਜਗ ਹਸਾਇਆ ਮਾਲਕ ਦਾ
ਮਖੋਲ ਬਣਾਇਆ ਮੇਰਾ
ਤੂੰ ਵੀ ਤੁਰ ਜਾ ਘਰ ਨੂੰ ਹੁਣ
ਤਮਾਸ਼ਾ ਅੱਜ ਦਾ ਮੁੱਕ ਗਿਆ
ਕੱਲ੍ਹ ਫੇਰ ਜਾਊਗਾ ਜੋਕਰ
ਕੋਈ ਸ਼ਹਿਰ ਨਵਾਂ ਹਸਾਉਗਾ
ਸ਼ਹਿਰ ਤੇਰੇ ਸੀ ਵੇਲਾ ਏਨਾ
ਹੁਣ ਜਾਣ ਦਾ ਵੇਲਾ ਵੀ ਆਉਗਾ
ਸੋਚਿਆ ਹੁੰਦਾ ਪਹਿਲਾਂ ਹੀ
ਫਿਰ ਦਿਲ ਕਿਉਂ ਪਛਤਾਉਗਾ
ਕਿਹਾ ਸੀ ਮੈਂ ਪਹਿਲਾਂ ਹੀ
ਕੁਝ ਦੇਰ ਮੈਂ ਹਸਾਉਂਗਾ
ਦੇ ਕੇ ਤੈਨੂੰ ਦੁਨੀਆਂ
ਆਪਣੇ ਰਾਹ ਤੁਰ ਜਾਉਂਗਾ
ਜਦ ਗੱਲ ਵਿਛੜਨ ਦੀ ਕਰਦਾ ਸੀ
ਤੂੰ ਓਦੋਂ ਵੀ ਰੁੱਸ ਜਾਂਦਾ ਸੀ
ਅੱਜ ਪੁੱਛਿਆ ਵੀ ਨਹੀਂ ਛੱਡਣ ਲੱਗੇ
ਕਿਉਂ ਜੋਕਰ ਓਦੋਂ ਹਸਾਉਂਦਾ ਸੀ?
ਆਜਾ ਸੱਜਣਾ ਦਿਲ ਮਹਿਲ ਵਿੱਚ
ਸਾਂਭ ਕੇ ਤੈਨੂੰ ਰੱਖਾਂ
ਤੇਰੀ ਮਹਿਫ਼ਲ ਵਿੱਚ ਹੈ ਦੁਨੀਆਂ
ਮੇਰੀ ਮਹਿਫ਼ਲ ‘ਚ ਤੂੰ ਹੋਵੇਂ…
ਬਹਿ ਕੇ ਤੇਰੇ ਸਾਹਮਣੇ
ਵਰਕੇ ਦਿਲ ਦੇ ਮੈਂ ਤਾਂ ਫਰੋਲਾਂ
ਤੇਰੀ ਅੱਖੀਆਂ ਦੇ ਬੋਲਾਂ ਨੂੰ
ਦਿਲ ਤਰਾਜੁ ਤੋਲਾਂ…
ਸੁੰਨੀ ਲੱਗੇ ਜਿੰਦ ਏ ਮੈਨੂੰ
ਜੇ ਤੂੰ ਸਾਹਮਣੇ ਹੋਵੇ ਨਾ
ਅੱਖ ਤੇਰੀ ਦੇ ਹੰਝੂ ਦੀ
ਏ ਜਗ ਵੀ ਕੀਮਤ ਹੋਵੇ ਨਾ…
ਕਰਦੇ ਦਿਲ ਦਾ ਹਾਲ ਬਿਆਨ
ਮੈਨੂੰ ਆਪਣਾ ਬਣਾ ਕੇ ਰੱਖ ਸੱਜਣਾ
ਜੇ ਆਖੇਂ ਕੀਮਤ ਪਾਉਣ ਲਈ
ਏ ਜਿੰਦ ਵੀ ਗਿਰਵੀਂ ਰੱਖ ਸੱਜਣਾ…
ਲੱਗ ਸੀਨੇ ਤੇਰੇ ਰੋਵਾਂ ਮੈਂ
ਤੂੰ ਹਰ ਅੱਥਰੂ ਦਾ ਮੁੱਲ ਪਾਵੇਂ
ਜੋ ਹੋਵੇ ਨਸੀਬ ਮੇਰਾ
ਮੈਂ ਤੇਰੀ ਤੂੰ ਮੇਰਾ ਬਣ ਜਾਵੇਂ…
ਤੈਨੂੰ ਕਹਿ ਜਾਵਾਂ ਦਿਲ ਦੀਆਂ ਗੱਲਾਂ
ਇੱਕ ਵਾਰੀ ਦਿਲ ਨਾਲ ਲੱਗ ਸੱਜਣਾ
ਮੈਂ ਰੱਬ ਨੂੰ ਵੀ ਪਾ ਜਾਵਾਂਗੀ
ਇੱਕ ਵਾਰੀ ਜੇ ਤੂੰ ਮਿਲ ਜਾਵੇਂ…
